unknown

ab ke safar kuch aur tha, aur hi kuch saarab thay
dasht-e-talab mein jaa ba jaa, sang-e-giraan-e-khwab thay
hashr ke din ka ghulghula shehr ke baam-o-dar mein tha
nigle hue sawal thay, ugle huye jawaab thay
ab ke baras bahar ki rut bhi thi inetzaar ki
lehzon mein sail-e-dard tha, aankhon mein izteraab thay
khwabon ke chaand dhal gaye, taaron ke dam nikal gaye
phuulon ke haath jal gaye, kaise yeh aftab thay
sail ki rehguzar huye, hont na phir bhi tar huye
kaisi aziib piyas thi, kaise ajiib sahaab thay
umar issi tazaad mein, rizq-e-ghubaar ho gayi
jism tha aur azaab thay, aankhen thin aur khwab thay
subah hui toh shehr ke shor mein yun bikhar gaye
jaise woh aadmi na thay, naqsh-o-nigaar-e-aab thay
aankhon mein khoon bhar gaye raston mein hi bikhar gaye
aane se qabl marr gaye, aise bhi inqlaab thay
saath woh ek raat ka, chashm-e-zadan ki baat thaa
phir na vo iltefaat tha, phir na vo ijtinaab thay
rabt ki baat aur hai, zabt ki baat aur hai
yeh jo fishaar-e-khaak hai, iss mein kabhi gulaab thay
abr baras ke khul gaye, ji ke ghubaar dhal gaye
aankh mein ruu_numa huye, shahr jo zair-e-aab thay
dard ki rehguzar mein, chalte toh kis khumar mein
chashm ke be-nigah thi, hont ke be-khitab thay